sasakala Cadas Pangeran

 

Cadas pangeran teh hiji tempat atawa jalan liliwatan antara Bandung-Sumedang. Jalan ieu teh mangrupakeun bagian tina jalan nu ngabentang sapanjang pulo Jawa ti Anyer nepi ka Panarukan. Baheulana eta jalan teh mangrupakeun gunung cadas anu kacida teuasna. Tah, dina taun 1811 rahayat Sumedang diparentahkeun ku pamarentah Walanda kudu gawe rodi pikeun naratas eta gunung jadi jalan.Waktu harita nu kumawasa di nagara urang teh Gubernur Jenderal Hindia Belanda nu ngaran Daendels.

        Watek Daendels sombong jeung galak, sagala kahayangna kudu digugu kaasup nyieun jalan ti Anyer nepi ka Panarukan. Jalan nu sakitu jauh jeung rumpil teh kudu rengse dina waktu sataun. Atuh rahayat digawe bebeakan, korban nyawa oge teu kaitung. Tapi si Daendels teu mirosea, jalan tetep kudu dianggeuskeun luyu jeung kahayang manehna. Saha bae anu wani ngabangkang bakal dihukum anu kacida beuratna.
        Dina hiji mangsa Deandels manggih beja ceunah nu migawe jalan di sumedang mah lendo pisan. Atukna Deandels datang sorangan ka Sumedang. Ieu pisan nu diwanti-wanti ku Bupati Sumedang nu jenengan Pangeran Kusumadinata atawa Pangeran Kornel. Anjeunna teu panuju pisan kana tindakan Deandels anu katalangsara, malahan nepi ka nemahanan pati lantaran katelengesan Deandels. Kukituna, waktu patepung jeung Deandels Anjeunna kacida ceuceub. Si Deandels nu ngajak sasalaman ku leungeun katuhu, ditarima ku Pangeran Kornel make dampal leungeun kenca. Ari leungeun katuhuna taki-taki nyekelan perah keris.
        Pangeran Kornel teu gimir sanajan kudu adu jajaten jeung Deandels anu kasohor bengis. Anjeunna ngabudalkeun uneg-unegna ka Deandels yen nyieun jalan lebah Sumedang mah leuwih hese tibatan di tempat sejen. Kukituna, kudu tinimbangan dina ngagawekeun rahayat Sumedang. Nyanghareupan nu leber wawanen kitu mah, Deandels teh rada miris. Ahirna Deandels sadar yen nyieun jalan di Sumedang teh kacida beuratna. Kiwari jalan lebah gunung cadas teh katelah Cadas Pangeran.